Шовинистердің дауысы қатты шыға бастады

Еуразиялық одақтың күшіне енетін мерзімі жақындаған сайын ел ішіндегі де, сыртындағы да орыстардың дауыстары зорая бастады. Тіпті, Ресейдің Украинаға жасаған басқыншылық әрекетіне қарсы өркениеттер әлемінің санкция жариялауы да олардың көр көкіректерін баса қойған жоқ. «Қазақта мемлекет болмаған» деген сықпыттағы гөй-гөйді тек Путин, Жириновскийлер ғана бықсытып отырған жоқ, қалың орыстың ішінде оны қолдаушылар көп.

Жақында қолымызға осы мазмұндағы бір хат түсті. Онда қазіргі Ақмола облысының Бурабай ауданындағы Кенесары ауылында туған (бұрын Көкшетау облысының Александрова селосы-авт), бүгінде РФ Тверь облысында тұратын В.Г.Букреев деген біреу Қазақстан Президенті Н.Назарбаевқа хат жазып, «ауылдан Кенесарының атауын алып тастап, бұрынғы Александров­ты қойсаңыз, дұрыс болады» деген сипатта «ақыл» айтыпты (хаттың ксерокөшірмесін қоса беріп отырмыз-авт).  Естуімізше, бұл хат Президент әкімшілігіне жолданыпты, ол жақтағылар «мәселе жергілікті жерде шешілсін» деген болуы керек, хатты ауданға жолдапты. Енді хаттың мәтінінен үзінді келтірейік (сөзбе-сөз аударма-авт): «…Қа­р­ақшы Кинесарыдан (хат­та солай жазылған-авт) қа­р­ақшы аз Подолькоға де­йін (әлгі бейбағың хаттың маң­дайына осылай деп айдар тағыпты-авт.)

 

 

 

…Құрметті Нұрсұлтан Әбішұлы!

Мен Шучье ауданындағы Александровка мектебін 1985 жылы бітірдім. Село 1917 жылға дейін станса бастығы болған Александровтың тегімен аталған. 70-80 жылдарды кеңшарды Аз.Подолько басқарды. Өтпелі кезеңде кеңшарда ескі православ шіркеуі жоғалды, ..тракторлармен бірге МТШ жанып кетті, мүмкін тракторларды сатып, сосын МТШ-ты артынан жағып жіберді ме, ол жағы белгісіз. Аз. Подолько солтүстікке көшерде ұлтшылдық алаяқтық жасап кетті. … Шучье ауданы Бурабай кентінде тұрған Кенесарының тағдыры Подольконың тағдырына ұқсайды. Тек,  Кенесары революция кезінде мезгіл-мезгіл Бурабайдағы шатқалдың ішінен Көкшетау мен Шучьенің трассасына шығып, ауқатты адамдар мен мемлекеттік қазынаны тонап тұрған» …Мына көксоққанның қай революцияны, қай трассаны айтып жатқанын түсінбедік. Осыған қарағанда Кенесары хан Қазан төңкерісі кезінде өмір сүрген деп ойласа керек. Әрі қарай – «Одан кейін үңгірге барып тығылып жататын. Артынан ешкім қуып шықпады ма деп тың тыңдайды. Қуғыншы жоқ екеніне көзі жеткен соң ғана тау арасынан шығып Бурабай кентіне келеді. Шалқып өмір сүрді. Әр түрлі үйлерде тұрды. Тарихта оның тонаған заттарын кедейлермен бөлісті деген дерек жоқ, сондықтан оны “жапа шеккендердің қорғаушысы” деп атауға болмайды. Сөйте тұра, оның атпен шауып келе жатқан ескерткіші Шучье селосы жолының бойында орнатылып қойылған. Кинесарының кезінде Шучье қаласы казактардың станицасы болды және егер ол өзін дұрыс ұстамаса, оны қамшымен ұрып және қамап тастар еді.

…Құрметті Нұрсұлтан Әбішұлы! Сіз Қазақстанды ондаған жылдар бойы басқарып келесіз. Бұрынғы Совет одағында сіз өзіңізді ақылды басшы екеніңізді көрсеттіңіз. Ресей Федерациясымен дос­тықты нығайтып жатырсыз… Александровканың атауын ауыстыру оқиғасы Ресей Федерациясымен достықты жақсартпайды, нығайтпайды, өйткені ол орыс халқының намысына тиеді! Сондықтан, Нұрсұлтан Әбішұлы, Сізден сұрайтынымыз, төмендегідей тапсырма беріңіз:

1. Кенесарының атауын алып тастап, бұрынғы Алексан­дров­каға қайта ауыстырылсын.
2. Жұмысшылар мен колхоз­шылардың мүсінін Қатаркөл се­лосына апарсын және орта мек­тептің жанына орнатып: «Сү­йікті мектебіне қайырымды оқушысы Аз.Подолькодан ес­­кер­т­кіш» деп жазылып қойсын.
3. Кенесарының мүсіні Бурабай кентінің маңайына орнатылсын, оның «жұмыс орны» сол депті.

Құрметпен, Букреев».

 

Букреев Қазақстаннан 2000 жылдардың басында кетіпті. Ауылдастары оны “пәлеқор”, “шатақ шал” дейді. Өзі елде жоқ шовинист, қазақтарға қаны қас көрінеді. Енді көрмейсіз бе, Ресейде жатып, ши жүгіртіп жатқанын. Басқасы басқа, Президентке мән айтып қоятынын қайтерсің? «Қазақтар күн көрсетпеді» деп барған жерінде жамандап жүретіндер де осылардың сортынан болады.

Советтер Одағы құлағаннан кейін, коммунист басшылары көтензорлықпен жасап берген баяғы «ұлы орыстық» мәртебесі жоғалып, мұндайға көр кеуделері лажсыз шыдап жүрген шовинис­тердің үні өшуге айналып еді, енді, міне, Еуразиялық Одақ келгелі олардың даусы қайтадан, қатты шыға бастады. Басқасы басқа, орыстың қаусаған шалдарының өзі қайта құтырайын деді. Мұның сыры неде екен? Тек, осылар бірдеңені біліп даурығысып жүрмесін де.

Дәулет АСАУ